Conta atrás para o Festival do Rei Sol 2017

 

Programación Festival do Rei Sol 2017 (Oia)

 

Comeza a conta atrás para o Festival do Rei Sol, que este ano se celebrará do 15 a 17 de setembro en Oia cunha oferta de actividades gratuítas pensadas para tódalas idades. Teatro, charlas e narración oral, talleres infantís e unha andaina son as diferentes propostas que inclúe este evento baseado na convivencia, a cultura e a posta en valor do patrimonio material e inmaterial.

Os actos centrais do Festival do Rei Sol, evento que toma o seu nome dunha lenda vinculada ao castro de Cano dos Mouros (Viladesuso), desenvolveranse o domingo 17 no propio castro. Alí terá lugar unha visita guiada, unha representación teatral, a observación do solpor acompañada de música e o espectáculo Os Contos do Rei Sol de Avelino González. Tamén haberá postos de comida e bebida, grazas á colaboración veciñal.

Nos días previos ao domingo tamén haberá actividades culturais vinculadas co patrimonio, repartidas por diversos puntos de municipio de Oia. O venres 15 se celebrará un taller infantil de arqueoloxía e o sábado 16 haberá unha andaina e outro taller infantil, neste caso de elaboración de traxes castrexos. Ese mesmo día celebrarase a charla-coloquio titulada Pactos de Hospitalidade e colaboración na Galicia Romana, con Sonia María García García (autora da novela Toca, el oro de la Gallaecia -Belagua Ediciones-).

No caso dos talleres infantís e a andaina as prazas son limitadas, polo que cómpre inscribirse no teléfono 689.35.57.13.

O festival, organizado pola Asociación Costa dos Castros e co financiamento da Deputación de Pontevedra dentro do Ano do Patrimonio; é posible grazas a implicación e participación da veciñanza e diversos colectivos de Viladesuso, nomeadamente a Asociación de Veciños, A Comunidade de Montes Veciñais en Man Común, A Fiada e o grupo de teatro O Mellor de Cada Casa. Con esta cita cultural preténdese fomentar a convivencia entre veciños e visitantes de Oia, poñer en valor o patrimonio local e concienciar sobre a necesidade de preservalo para as vindeiras xeracións.

Para mantervos actualizados de tódalas novidades, seguide o evento do Festival do Rei Sol en Facebook.

 

 FESTIVAL DO REI SOL 2017. HORARIOS E LOCALIZACIÓNS:

  • VENRES, 15 DE SETEMBRO

-19.30 horas: Taller infantil: Pequeno Laboratorio Arqueolóxico.

Prazas limitadas. Require inscrición. C. Cultural de Pedornes.

 

  • SÁBADO, 16 DE SETEMBRO

-10.00 horas. Andaina por Viladesuso.

Prazas limitadas. Require inscrición.

-17.00 horas. Taller infantil de traxes castrexos.

Prazas limitadas. Require inscrición. C. Cultural de Oia. (Ubicación)

-18.00 horas. Charla-coloquio Pactos de Hospitalidade e colaboración na Galicia Romana, con Sonia María García García; autora da novela Toca, el oro de la Gallaecia.

Entrada libre. C. Cultural de Oia. (Ubicación)

 

  • DOMINGO, 17 DE SETEMBRO

Actos no castro de Cano dos Mouros (Viladesuso)*: (Ubicación)

-18.00 horas: Visita guiada no castro.

-19.00 horas: Representación teatral a cargo do grupo O mellor de cada casa.

-Contemplación do solpor amenizada pola Fiada de Viladesuso.

-21.00 horas: Espectáculo Os contos do Rei Sol, de Avelino González.

 

*En caso de chuvia a festa trasladarase ao C. Cultural de Viladesuso. (Ubicación)