Calorosa acollida ao libro sobre o campo de concentración do Mosteiro de Oia

Un momento da presentación.
Un momento da presentación.

 

A sala quedou pequena este mércores na presentación do libro “Con otra mirada. Horror de la guerra civil española en el Monasterio de Oia 1936-1939”, xa que foron moitas as persoas que se achegaron ata a Casa Cultural de Santa María de Oia para coñecer os resultados do traballo realizado por Fernando Javier Costas Goberna, Lorena González Vicente e Lucía Álvarez Caeiro.

O acto foi presentado polo vicedecano da Facultade de Bioloxía da Universidade de Vigo e vicepresidente de Costa dos Castros, Manuel Ángel Pombal Diego; quen deu paso a Costas Goberna, o encargado de debullar os interesantes contidos textuais e gráficos desta obra: unha rigorosa do período histórico no que o cenobio cisterciense funcionou como campo de concentración. Pechou o acto a alcaldesa, Cristina Correa, pois a publicación está editada polo Concello de Oia.

Como avance do contido do libro deixámosvos a continuación o texto que aparece na lapela da publicación:

“Resulta paradoxal que a primeira utilidade pública destas dependencias, e única ata a data, despois da súa declaración como ben de interese nacional en 1031, fose para un fin tan afastado da intencionalidade que aquela declaración suxería, xa que poucos anos despois durante a guerra civil española se converteu en campo de prisioneiros do derrotado bando republicano. No interior dos seus muros, tanto os desafortunados que sufriron o encarceramento en tan difíciles e dolorosas circunstancias, como os seus carcereiros, deixáronnos unha testemuña única, a base de textos e debuxos a través dos que podemos facer un saudable exercicio de aproximación ás emocións e sentimentos que configuraron os tráxicos momentos que se viviron alí”.

 

Se queres coñecer un pouco máis sobre a obra, podes premer nesta ligazón.

 

Sinatura de exemplares do libro.
Sinatura de exemplares do libro.

 

Na Asociación Costa dos Castros, da que tamén forma parte Fernando Javier Costas Goberna, alegrámonos inmensamente da boa acollida deste traballo por parte da veciñanza oiense e queremos aproveitar para agradecer a asistencia de todas as persoas que se achegaron á presentación. Unha vez máis, quedou demostrado que a defensa do patrimonio é cousa de todas e todos.

 

O acto contou cunha grande afluencia de público.
O acto contou cunha grande afluencia de público.