Patrimonio


Warning: Wrong parameter count for strstr() in /usr/home/costadoscastros/www/wp-content/plugins/multilanguage/multilanguage.php on line 2134

Warning: Wrong parameter count for strstr() in /usr/home/costadoscastros/www/wp-content/plugins/multilanguage/multilanguage.php on line 2140

 Visita guiada A Cabeciña

A Costa dos Castros: arqueoloxía, natureza e moito máis

 

Patrimonio arqueolóxico

O rico patrimonio arqueolóxico de Oia é o punto de partida da maioría das iniciativas da Asociación Costa dos Castros. No marco de actuacións desenvolvidas por ACdC inclúense intervencións en diversos enclaves, entre eles 3 situados en zonas altas e que parecen formar parte da mesma estratexia de ocupación da paisaxe: comparten semellanzas formais e o feito de estar situados en lugares de gran dominio visual da terra e do mar.

Os 3 recintos, situados en diferentes parroquias do municipio, son:

  • A Cabeciña: tras varias campañas arqueolóxicas neste castro situado en Mougás, e do estudo dos petróglifos situados nas proximidades do recinto fortificado, o seguinte paso a dar será a restauración da área onde se fixo a escavación.
  • Cano dos Mouros: neste castro non se teñen feito intervencións coma as de A Cabeciña, pero si actuacións de limpeza de vexetación baixo o correspondente control arqueolóxico. Para este entorno, situado na parroquia de Viladesuso, apóstase pola valorización da tradición oral coa lenda do Rei Sol.
  • Chavella: téñense feito accións de limpeza e topografía, así como varias sondaxes valorativas para avaliar o seu estado e tratar de afondar no coñecemento deste enclave de Santa María de Oia.

Castro de Chavella Oia Galicia Rías Baixas

Pero as actuacións arqueolóxicas da Asociación Costa dos Castros non se centran soamente nestes 3 enclaves, senón que tamén comprenden intervencións en elementos de arte rupestre.

Grazas a unha campaña de crowdfunding, acometéronse labores de limpeza de vexetación (roza e tala) na zona do Viveiro (Pedornes), onde se atopa o petróglifo de Auga dos Cebros, unha xoia arqueolóxica ao estar considerada a única representación dun barco mediterráneo do II Milenio a.C. en todo o contexto atlántico. Estes traballos permitiron valorar o estado deste relevante gravado e doutros petróglifos da zona, así como descubrir algúns novos.

Auga dos Cebros. Pedornes, Oia.
Una brigada traballa na limpieza no Viveiro. Abaixo á dereita, o petróglifo de Auga dos Cebros.

Xunto a estes lugares, outro punto arqueolóxico imprescindible na Costa dos Castros e a estación rupestre da Pedreira (Santa María de Oia). Ademais de empaparnos de Prehistoria, neste enclave tamén podemos gozar dunhas impresionantes vistas ao Mosteiro de Oia, o barrio do Arrabal e algúns tramos do Camiño de Santiago Portugués pola Costa.

Patrimonio natural

Estes elementos arqueolóxicos atópanse en contornas naturais de gran beleza e singularidade. Exemplo disto é o impresionante bosque das Sobreiras do Faro, próximo a Cano dos Mouros; ou a zona de fentos xigantes que hai no Viveiro, xunto ao río Vilar.

Pozasde Mougás. Oia. Rías Baixas. Galicia
Pozas de Mougás

No apartado de patrimonio natural tampouco podemos esquecernos das coñecidas Pozas de Mougás e a impresionante caída de auga do río da Fervenza.

O mar e a rochosa liña costeira son outros dos elementos fundamentais na paisaxe natural de Oia, pero tamén na historia desta zona das Rías Baixas. O Atlántico agasállanos con sorprendentes panorámicas de horizontes infinitos, pero tamén atesoura segredos sobre batallas navais, naufraxios e relacións comerciais milenarias.

E moito máis

O patrimonio da Costa dos Castros tamén está nas súas xentes, no seu falar, nas súas festas e tradicións. E para coñecelas, non hai nada mellor que visitar a zona aproveitando algún momento de celebracións: festexos tradicionais, semanas culturais, festivais, curros de cabalos… Son algunhas das citas fundamentais para entender mellor a esencia deste máxico lugar do Sur de Galicia.

Na Asociación tamén traballamos neste ámbito, xunto coa colaboración doutras entidades e colectivos veciñais. Exemplos das sinerxías creadas son a Festa da Cervexa da Cabeciña e o Festival do Rei Sol, onde se combina a convivencia veciñal coa posta en valor destes dous enclaves castrexos.